رحلة البحث عن السعادة

مين قال إن الحياة المفروض تبقا سهلة!
ده مش تشاؤم، الدنيا دار اختبار و الاختبار لازم يكون فيه تحدي و صعوبات عشان تتعلم منه و عشان تستاهل تستمع بنتيجته.
ربنا قال (لقد خلقنا الإنسان في كبد)، خلقنا عشان نعافر و نتعب ..ساعتها بس هنحس بالسعادة😊
كلامي مش راكب علي بعضه صح؟
طبيعي لأن المعاني تعرف بنقيضها...يعني زي ما لولا الطعم الحادق ما كناش هنعرف الطعم الحلو،فعمرنا ما هنعرف طعم السعادة لولا وجود تحديات الحياة.
السعادة مش بس في لحظات النجاح و الفرح و الراحة و كل اللحظات الوردية اللي مرتبطة في ذهننا بالكلمة دي.
السعادة ممكن تكون في كل لحظة ضعف بتحس فيها بوجود ربنا حواليك.
في كل لحظة وحدة انكسار و خوف بتعلمك ما تلجأش غير ليه و تتوكل عليه.
في الناس اللي ربنا بيحطها في طريقك..مش بس الناس الحلوة اللي بيخلوا رحلتنا احلي، لا كمان في الناس اللي بتأذينا بقصد او بدون قصد و بيعلموك دروس و بيخلوا شخصيتك اقوي،
في قدرتك انك تسامحهم و تعدي و تنسي.
السعادة في كل محنة بتتجاوزها بمعية ربنا و تعرفك قدرك و امكانياتك و انك مش هش و ضعيف زي ما كنت فاكر.
في كل خيبة أمل افتكرت ان حياتك مش هينفع تكمل بعدها ولا تحلم ولا تثق في حد تاني..بس رجعت لقيت نفسك لسة قادر تشوف اشخاص و اهداف في الحياة يستحقوا تبص لقدام عشانهم.
في كل لحظة حزن و تعب بتعلمك تستمتع بعدها باحساس الفرحة و الراحة.
في كل نعمة اتحرمت منها خلتك تحس بباقي النعم اللي في ايدك و تقدر قيمتهم و تحمد ربنا عليهم فيزيدك من نعمه و يعوضك بأحلي مما فقدت.
في لحظة ندم و توبة من ذنب بتخليك تعرف ان ضميرك لسة حي و بترجع بعد التوبة كأنك مولود من جديد.
السعادة في حسن الظن بالله و الشعور بالرضا....السعادة في إدراك قيمة الدنيا و إنها مجرد "ترانزيت".