احترس لا تدخل الكلية الكلية فيها سمٌ قاتل".

بمناسبة نزول الجدول و اقتراب امتحانات الثانوية العامة و اللي بيجي بعدها اليوم المنتظر في حياة كل طالب مدرسي غلبان و هو يوم التنسيق و احب اقولك انك كده ميت و كده ميت يبقا هتخاف من ايه!؟،

في الفترة ما بين ظهور النتيجة لغاية التنسيق تنتشر  نصائح تحذيرية شديدة اللهجة من طلبة الجامعة لخريجي مرحلة الثانوية العامة علي مواقع التواصل الاجتماعي. جميع تلك النصائح تدور حول جملة واحدة " احترس لا تدخل الكلية الكلية فيها سمٌ قاتل". 

و دي بتكون اول مرحلة في تحطيم احلام طالب ثانوي الغلبان في انه خلاص خرج من عنق الزجاجة و هيرتاح بقي ، ليكتشف من تلك النصائح انه هيتحشر في عنق زجاجة اضيق او غالباً في الشاليموه بتاع الزجاجة الاولي.

لذلك حبيت النصائح دي لخريجي الثانوية العامة عشان اخفف من عليهم و اساعدهم علي التفاؤل 

كل واحد بإيده يتحكم اذا كانت المرحلة الجامعية دي تكون رحلة من الملل والعذاب او رحلة مفيدة و ممتعة في نفس الوقت عن طريق:

١-لا تستمع لتلك النصائح التحذيرية لان الامر بيختلف من شخص لآخر،و معظمنا عنده اعتقاد ان كليته اكتر كلية فيها مشاكل.

٢-ادخل الكلية اللي انت بتحب مجال دراستها،و الغي من قاموسك جملة( كليات القمة) لانك لو بتحب حاجة هتبقي مميز فيها ،لكن لو بتدرس في كلية ما بتحبهاش حتي لو كانت كلية رواد الفضاء هتفشل . 

٣-لو كنت من ضحايا التنسيق و ما قدرتش تدخل الكلية اللي بتحلم بيها، دي مش نهاية الطريق اختار كلية تانية مجال دراستها قريب من كلية احلامك عشان تقربك من الحاجة اللي بتحبها و خد تدريبات و كون خبرات في المجال اللي كنت عايز تدرسه عشان لما تتخرج تقدر تشتغل فيه

٤-في اي كلية هتدخلها سواء في جامعة حكومة او خاصة في حاجات مش هتعجبك وهتفرسك من مستوي دراسي او خدمات او طريقة تدريس و هكذا . حاول تتكيف مع المشكلات دي و اسعي انك تحلهاعلي قد قدرتك، بدل ما تربط المنديل علي دماغك وتسب و تلعن اليوم اللي دخلت فيه الكلية دي  ، لان ما فيش حاجة كاملة و مريحة١٠٠٪

٤-انزل تدريبات و اشترك في انشطة كتير و فكر برة الصندوق،جرب متعة الحياة العملية و انسي الحفظ و الصم و القولبة.

و اخيرا مرحباً بكم ايها المفروسون الجدد.